Sunday, April 05, 2020

...Hum Shukr ki Eid Manaayenge



Bada mushkil raha hai mera Safar, bahut majboor maa hoon main
Tu mere Rabb ki Amaanat hai, ek gunahgaar Mominah hoon main
Teri tarbiyyat ko tarjeeh dekar, ek ibaadatguzaar gulistaan hoon main
Iblees se tujhe bachaane ki Jung me, talabgaar-e-fatah jaavedaan hoon main

Ilm ki khaatir maine jab bhi tujhe saqti se tadpaaya hai
Dukhte dil ko mere badi mushkil se Sajdon me behlaaya hai
Apni mohabbat se zyaada, Rabb ki shafaqqat ko tere liye chaaha hai
Ke mere aanchal se behtar tere liye Arsh-e-Baari Ta’ala ka saaya hai

Apni neendon ko na bechain kar, kuch laa-haasil khwaabon se
Ab jaag, meri jaan, na kar zaaya waqt sang-dil insaanon pe
Kuch khwaabon ko tujhe sach karna hai, Tawakkul aur Duaon se
Sabr ki dor pakde rehna mazbooti se, bachna baatil sahaaron se

Meri mamta ka saaya ek din hat jaayega tere sar se
Meri duaon ka pehra tab bhi lehraayega tere dar pe
Mere baad bhi aise jeena tu ke uth jaana apne bistar se
Rabb ke Hukm ko dena tarjeeh apne karobaar-o-daftar me

Tere rishton ki, tere jazbon ki kasauti sadaa rahe Deen-e-Ilaahi
Har aandhi, toofaan me bana rehna Haafiz-e-Shariath-e-Muhammadi ()
Tere har silsile me, har faisle me rahe Rabb raazi, ho tujhe ye kaafi
Gunaahon ke samandar me apni Rooh ko rakhna Jannat ke liye pyaasi

Rabb ka mehmaan banne ke liye tujhe khud ko taa-umr nikhaarna hai
Teri wo Jannat jo mere qadmon me hai, tujhe usko haasil karna hai
Rabb ko raazi kar-kar ke hume milkar usko aise sajaana hai
Ke har darwaaze se tujhe pukaara jaaye - Aye Ibaadi tera ye thikaana hai

Mujhe us din dhoond kar tu mera haath thaam lena zidd kar
Kehna, “Ye meri maa thi - gunaahgaar, par thi Tawheed par
Meri parwarish kee isne, Ya Rabb, teri Razaa ki ummeed kar
Aaj isko bakhsh de, Ya Allaah! Iske gunaahon ko Aaj radd kar.”

Tujhe dekh kar Muhammad-ur-Rasool-Allaah (ﷺ) faqr se muskuraayenge 
Tere sabr ki pyaas ko wo (ﷺ) apne haathon se Hauz-e-Kauthar pe bujhaayenge
Phir hum Nabi () k humsaaye me ek khoobsoorat ghar basaayenge
Rehmat-al-il-Aalameen () ko hum apna mehmaan banaayenge. 

Tujhe jis-jis ne thukraaya hai wo tere saath ko taraste reh jaayenge
Anbiya, Sahaaba aur Shuhdaah - ek-ek kar tujhe galey lagaayenge
Rabb ke karam se chamakti hui hum apni Jannat me jeet lehraayenge
Us din Jannat ki fizaaon me hum shukr ki Eid manaayenge

(In Sha Allaah!)
~UmmHashiR



No comments:

I am nobody, but a stranger, only a simple wayfarer,
My journey is this life till I reach the Hereafter..
Traveling all along the footsteps of my Teacher
,
For I have to, in time, reach the destination promised by MY
SUSTAINER...