Monday, April 13, 2020

KAHO! Kiski Baadshaahat hai!?


Ye khaali sadkein, veeraan imaaratein - bebas shaan-o-shohrat hai
Parwaaz ko tarasti hai udaan, har dil me machalti adhoori hasrat hai
Sooraj ki roshni, Chand ki chamak par -  EK Waahid  Khabza-e-Qudrat hai
Fizaayein goonj uthi hon jaise, “Kaho! Kiski Baadshaahat hai!?”

Masaajid hue band, aaj pahonch se bahut door hai Allaah ka Ghar
Wo parakh raha hai khamoshi se hamaare Aamaal-e-ilm-o-hunar
Kya Qiyaam ki lazzat me hum jaagkar gale lagaate hain seher?
Ya zaroorat se zyaada narm humne banaaye hain apne bistar?

Beparwah jee rahe hain hum, in chamakdaar deewaaron me
Ghar mehek rahe hain hamare khushbudaar pakwaanon se
Wo rishte aaj beghar hain, jo baste the khuddaar baahon me
Kayi pariwaar hain mohtaaj aaj, bas do-chaar niwaalon ke

Zayeef, besahaara, tanha, kamzor, yateem aur berozgaar
Shaayad koi beemaar anqareeb tha hamaari madad ka talabgaar
Shaayad koi masoom roya ho aaj karke mamta ko laachaar
Shaayad koi miskeen soya ho aaj bhook se thak-haar

Apni Nafs-e-Ammaara ko ab hum Islaah ke saanche me dhaalte hain
Khudgarzi ke kafan se baahar apne zinda wajood ko nikaalte hain
Kaduwaahat ko dilon se mitaa kar, rishton me shafaqqat gholte hain
Dukhte dilon ko dhoond dhoond kar kuch alfaaz marham-se bolte hain

Aao! Huqooq-al-Ibaad adaa karne ki Rabb se Taufeeq maangte hain
Jo USKI razaa se jaa milti hai us raah-e-tasdeeq ko chunte hain
Apne dilon ko Ashaab-e-Rasool (رضي الله عنهم) ki Taareeq se jagaate hai
Ummat-e-Muhammadi () ki hum ek tehreek ko sajaate hain

~ UmmHashiR


No comments:

I am nobody, but a stranger, only a simple wayfarer,
My journey is this life till I reach the Hereafter..
Traveling all along the footsteps of my Teacher
,
For I have to, in time, reach the destination promised by MY
SUSTAINER...